黃百鳴導演多次認為星爺收貴,但值得,
實際上星爺當年連續接拍太多片,想喘口氣推掉休息,卻又不敢直接拒絕,就會故意拉高價格好讓對方知難而退,但因星爺太紅,資方再貴都肯付,才會誤以為是在坐地起價的情況,同樣的事在王晶也發生過。

大家有冇發現,自92年賀歲檔上映過周星馳、張國榮同張曼玉主演嘅《家有囍事》後,之後每逢過年,一打開電視機,總會有電視台重播呢套戲,而觀眾好似睇極都唔厭,只要見到電視播緊就一定唔會轉台!嗱!呢部喜劇經典都係黃百鳴一手炮製出嚟!佢日前接受本報連載式專訪,爆咗唔少開拍呢部戲時,好多鮮為人知嘅趣事出嚟!

佢話部戲找周星馳演係迫於無奈,1992年拍攝《家有囍事》找周星馳是「被迫」,佢話:「我最先呢個角色三兄弟,林子祥做大佬、張國榮同我、我就做個camp camp地,拍吳君如做個tom boy o架嘛,張國榮做周星馳嘅角色,就拍張曼玉,點知林子祥間屋...就喺,你記唔記得有一年(地震定火燭)火燭,返唔到嚟,喺美國返唔到嚟咁點呀!即刻換人囉!咁我第一時間就搵周潤發啦!點知周潤發就話我又做緊又係賀歲喎!嗰個叫做《我愛扭紋柴》,咁即係同你對打台喎!咁即係又係唔得啦!唔得,咁死喇,左搵右搵,咦!咁嗰陣時周星馳就啱啱冒升緊,咁就搵佢傾啦!」

當年找星仔拍呢部戲,星仔開咗一個天價,但黃百鳴一樣照俾佢:「我趕住要開拍吖嘛!咁所以呢,我明知佢收緊人哋200萬,佢要攞我800萬,我都畀佢,條友仔梗係(舌累)飯應啦。當然佢有個要求啦!睇完個劇本,佢話可唔可以畀我同張曼玉做對手呀!我話唔得,我同佢講:『錢你就攞足喇!嗰個對手係張國榮,已經定好咗o架喇,我話有兩個角色畀你揀,一係你就做個花心老公,一係就做個camp camp地,佢話打死我都唔做個camp camp地o架喇,寧願做個花心老公。」

1990年哥哥退出返咗去加拿大,我就話一定要搵哥哥復出拍《家有囍事》,我就畀咗個任務高志森,咁哥哥真係太後生退休嘛!咁我就叫咗高志森過去搵哥哥,寫好咗個劇本架喇!我就叫佢做個花花公子配呀張曼玉,叫高志森過去畀個劇本佢睇,想佢返嚟拍呢套戲,哥哥應承咗!」

點知佢一落飛機,就捉住我,話一定要同我飲餐茶,仲去我嘅乾坤閣,一坐低就話,嗱,我睇完個劇本,你唔好同我爭,我要做camp camp地,個對手係毛舜筠因為我哋兩個做係一定贏嘅,咁得啦,我唔會同你爭,我畀你啦!咁我惟有做個花心老公啦!跟住就撥個輪畀周星馳,同佢講:『喂,o靚仔你恨到喇!依家真係你同張曼玉做對手,咁我就同吳君如,點知又輪到吳君如抗議喇,喂,我做個tom boy, 我已經準備好晒,我會做得好好o架喎!你o依家要我做個賢妻良母,我點做呀!即做個白燕我點做呀!你咪做個搞笑嘅白燕囉!所以嗰執汗毛係我叫佢加上去o架!我話你整執汗毛喺度啦!」

 經歷香港電影黃金十年,龐大的收益,逢片必賺仿如生金蛋的效應,終於吸引到一班冇寶不落的黑社會入局,正式入侵娛樂圈。黃百鳴講返個段時期都有啲慨嘆,佢話:「好景嘅年代啦,又出現到搶演員呀、搶檔期呀、唔係符合我哋電影嘅規矩啦。我遭遇過嘅係最大鑊嘅,就係搶底片。」


當時百鳴拍咗套賀歲劇《家有囍事》,黑社會就派人嚟搶底片:「嗰陣時我完全唔知道,有一晚因為我哋已經拍好咗《家有囍事》,準備排過年。有一晚我喺屋企沖緊涼,準備休息嘅時候,收到個電話。係我沖印廠打嚟嘅話『老闆,好大鑊』,原來有三個幪面賊拿住手槍,衝入沖片廠,當時沖片廠只有一個剪片師喺度做緊嘢。三個賊講到明唔係嚟劫錢,係劫《家有囍事》嘅底片,個剪片師嚇到手都震埋。」

事緣當時底片正正喺剪片師腳底,仲大大隻字寫住《家有囍事》,三個賊只要低頭就會見到,可能佢哋都騰雞,只係識用支槍篤住剪片師個頭問「喺邊度,喺邊度」,剪接師嚇到唔識講,佢哋用牛皮紙封實剪片師個嘴,之後就開始摷。觀塘間沖片廠足足萬幾呎,當然搵唔到,百鳴笑說:「後嚟佢哋搵到裏面有間房鎖住嘅,佢哋一腳打開度門衝咗入去,見到枱上面有三個好精緻嘅鐵盒寫住《家有囍事》。原來就係《家有囍事》嘅底片沖咗第一次嘅毛片出嚟,即係等於你舊陣時嗰啲菲林,你影完可以沖好多張相都得,最緊要嗰張菲林,嗰卷菲林等於嗰啲底片。嗰啲相就成盒喺度,佢就攞完就走咗。原來真係有鬼揞眼。」事後《家》片仲要補拍一個槍戰片結尾韓國版,因為發生持械搶菲林,所以當周星馳、張國榮同百鳴喺樹林補戲時,成班警察係包圍咗拍攝嘅地方。而因為呢件事,引起咗全香港喺90年代嘅第一次名為「反暴力大遊行」演藝界大遊行。

 

不過黃百鳴認為最攞電影命嘅,就係嗰啲盜版VCD。每次午夜場,黑社會都會派人霸咗兩行位,棟部機喺度拍,轉頭已經有得賣,佢話:「所以後嚟搞到我哋斬腳趾避沙蟲,唔敢再做午夜場。其實午夜場真係一個畀人哋有talking point嘅。如果你禮拜六唔睇過午夜場,禮拜飲茶你真係冇嘢講。」盜版嘅傷害性實在太大,喺嗰啲商場度啲人大搖大擺飲完茶去買十隻八隻盜版,甚至警察局門口都有得賣冇人去拉,百鳴話搞到電影人冇以為繼:「啲人開始唔去戲院睇戲,睇盜版,於是就有99年第二次嘅大遊行,名為「反盜版大遊行」從90年代香港嘅電影由每年生產300部,跌到得4、50部,香港嘅電影院最高峯有14萬個座位,到今日4萬個都冇,都係拜盜版所害,佢話:「我形容呢個黑暗嘅年間亦都長達十年,就係1995年去到2004年。唔好講香港盜版死埋啦,香港連陀地都死埋啦,嗰陣時我哋拍戲有陀地收錢,現在個個都上晒大陸,冇錢收。」

 


採訪:陳月媚、懷鈺
攝錄:馮峰、卓振輝
攝影:陳俊強
編審:馮國康
剪接:梁依能
撰稿:Sapna
旁白:Sapna

轉貼資料來源  蘋果娛樂【最港電影大獎】
https://hk.entertainment.appledaily.co ... article/20180130/57736647
https://hk.entertainment.appledaily.co ... article/20180131/57771014

覺得讚想推薦或分享嗎?