周星馳，單單呢3個字，正如古晶話齋，足以改進社會風氣，風靡萬千少女，提高年青人嘅內涵，刺激電影市道……冇錯，大家都好掛住星爺。賀歲片《美人魚》下月上映，星爺終於再度現身，一解星粉單思之苦！
雖然新戲《美人魚》睇唔到佢演出，但今次「人人問星爺」算係集體回憶，我哋將佢經典電影對白夾雜喺問題之間，考吓星爺記性之餘，亦知多啲佢對舊作嘅睇法。當中考對白環節一啲都難唔到星爺，仲俾佢話問題太淺；而喺咁多電影入面出現過嘅「毒藥」之中，星爺最愛一日冚包散，佢話個意境好好喎。
問：你真人鍾唔鍾意飲Dry Martini？（國產凌凌漆）
答：呢個問題真係問得好，其實我係幾鍾意飲Dry Martini，我年青嗰時特別OK嘅。
問：識唔識一個叫Mike Chan嘅朋友？（逃學威龍2）
答：其實我係唔識，我係完全冇一個朋友叫Mike Chan。
問：你覺得邊種食物最恐怖？一日冚包散、含笑半步釘（唐伯虎點秋香）定淫賤不能移（整蠱專家）？
答：我鍾意一日冚包散，佢係咪最恐怖我就唔知喇，但我鍾意嗰個意境囉。
問：特異功能中，你寧願識捽牌、天眼通定你睇我唔到你睇我唔到？（賭聖、賭俠）
答：其實我就鍾意「你睇我唔到你睇我唔到」嘅。
問：做人冇夢想同條鹹魚冇分別，咁你仲有咩夢想未做？（少林足球）
答：夢想我仲有好多，都好多未做到，所以我咪成條鹹魚咁囉。
問：星爺我想考吓你，以下對白嚟自邊套戲？飛係小李飛刀個飛，刀係小李飛刀嘅刀。
答：係《國產凌凌漆》。
問：十室九貧湊得八兩七錢六分五毫四厘，尤且三心兩意一等下流。
答：淺唔淺啲呀？係咪《回魂夜》呀？《唐伯虎點秋香》啦梗係。
問：你對你嘅景仰，有如滔滔江水，連綿不絕。
答：唔好啦，咁淺，《鹿鼎記》。
問：聽聞《美人魚》故仔係講填海，係咪base on香港背景？
答：故事係有啲填海情節，不過唔係講香港，係內地某個地方。
問：點解諗到拍美人魚，唔拍尼斯湖水怪呢？
答：我早啲識得你就好喇，我一於就拍尼斯湖水怪，唔拍美人魚啦應該。
問：點解要揀美人魚呢個題材，聽講係一部主講愛情嘅電影嚟喎？
答：冇錯，你講啱咗，美人魚梗係關於愛情啦，係一套異類物種交叉戀愛嘅故事。
蘋果日報 2016/01/19 23:05
http://hk.apple.nextmedia.com/enews/realtime/20160119/54662371
01-17 星爺好憂鬱！ 粉絲揪團香港挺《美人魚》...