星爺周星馳經常俾記者影到o係中環鬧市踩單車，
前晚佢又o係中環蘭桂坊出現，著住運動裝、頭戴Cap帽，
一身sportylook示人，不過今次就冇踩單車。
雖然冇o左兩個轆，但星爺一見記者，對腳就好似開o左turbo咁，
行得好鬼快，令馮仁昭大開眼界。其實前晚星爺身邊仲有個著西裝o既斯文男人同行，
估計星爺本o黎諗住同朋友去蘭桂坊飲杯o野，點知撞到一大班記者，
敵不過閃光燈狂閃，最後惟有拋低朋友，搭的士走人。

猛講新年快樂

呢排香港電影揚威國際，劉偉強繼《無間道》後，
另一作品《傷城》同樣俾荷李活片商睇中，
馮仁昭本來都諗住問o下星爺有冇荷李活片商睇中佢o既劇本，但佢就冇答。
再問佢對於香港電影咁威水有乜睇法？
點知星爺即刻發揮其無厘頭本色話：「新年我o地唔好講呢o的住啦！」

本來馮仁昭打算叫星爺企定定傾一陣，佢話：
「閃光燈閃住點答問題？」不過當冇人影相o個陣，星爺仍然打算鬆人。
雖然佢乜都冇答，只係猛講新年快樂，
但咁有禮貌，馮仁昭點都要同佢講番句多謝晒o既！

2007-3-3 香港蘋果日報