盧冠廷20多年沒有出碟,早前推出專輯《Beyond Imagination》將舊歌重新編曲,其中來自周星馳電影《西遊記大結局之仙履奇緣》的插曲《一生所愛》,一夜在討論區網民洗版討論。創作者盧冠廷形容導演劉鎮偉收到作品時亦不看好,以「嘩,咁勁呀」來形容,卻想不到此曲可以紅足20多年影響四代人,但論到最滿意的作品盧冠廷反而喜歡《陪着你走》。

盧冠廷跟太太唐書琛昨日在西沙公路的茶座接受訪問,為盧冠廷新推出的專輯《Beyond Imagination》宣傳,已有20多年沒再次出碟的他,笑言以為自己已經退出音樂圈。新專輯當中一首舊歌、電影《西遊記大結局之仙履奇緣》的插曲《一生所愛》推出時,瞬間被網民在討論區洗版,以聽完之後感動到「毛管戙」來形容入心入肺的歌詞。

盧冠廷兩夫婦笑言話一向沒有留意facebook及討論區,亦不明白「洗版」,他們回想當年寫《一》曲之前,是先聽導演劉鎮偉講個故事,盧冠廷說:「佢話係講一段500年嘅感情冇得開花結果,你知劉鎮偉講古仔幾叻,我聽古仔時都毛管豎起,聽完當晚返到去已經寫好,算好快。」《一》對他的意義是超越想像,可以令他在未來日子做一首更受歡迎的歌曲。 唐書琛:呢首歌紅冇人估到

身邊的唐書琛亦表示第二日早上已經填好詞交貨,因為朱茵跟周星馳戲中的故事令她感受很深,唐書琛說:「呢首歌紅冇人估到,可以話係『自燃』咁紅咗出嚟,唱片公司之後都話睇漏眼。啲詞交得快可能古仔hit到我,既然500年愛情都冇結果,唔相信係緣份都唔得,可能係循環亦可能係因果,會諗點解五、六世都唔可以一齊。歌受歡迎同好多人有同類嘅感覺例如愛情、家庭或者際遇,始終唔成功嘅例子多,多人有共鳴。」

雖然《一》曲受歡迎,但盧冠廷滿意的作品反而是《陪着你走》,他說:「最經典未有,比較滿意係《陪着你走》。試過有位中年男士拖住10歲女嚟多謝我,話太太之前喺醫院昏迷,兩父女就一直唱呢首歌令太太最後醒番。」歌詞出自唐書琛手筆,她說:「呢首係填得最快一首,聽完第二朝啲字衝出嚟,衝到一隻手寫唔切。」

「《賭神》出場音樂係我作嘅」

盧冠廷透露當年唱片公司跟導演都沒有想過《一》曲會紅到這個地步:「嗰時寫完畀劉鎮偉睇佢話『嘩,咁勁呀』,即係佢都覺得同套片唔配,笑片配首咁慘嘅歌,其實套戲我都只係睇過臨尾朱茵同周星馳喺城樓個場,即係我首歌起音樂嗰段。記得宣傳都係谷家英哥首《Only You》,啲詞係劉鎮偉自己填上去,嗰時錄音家英歌都唔識入英文歌個key,每次都要我係背脊拍佢『唱嘞』佢先識入。」早年周星馳再用《西遊記》做題材拍咗套《西遊.降魔篇》,入面再用《一》曲,盧冠廷指版權其實屬於唱片公司,唐書琛表示記憶中周星馳在開拍前有禮貌地知會過一聲。

盧冠廷在香港電影黃金時期,包辦了不少電影配樂工作,電影《賭神》周潤發出場的配樂亦是盧冠廷作品,他笑說:「係呀,係吖我作嘅,《賭俠》、《賭霸》、賭乜賭乜都係我寫。試過有次搭電梯啲人手機鈴聲就係呢首音樂。個構思係中國人電影,要威,周潤發披住大衫要威行出嚟,除咗『打打打打打打』之外我都諗唔到第二樣,睇完畫面個腦就會充滿音樂符號。音樂創作冇step one,step two跟住就有首歌,Beatles都答唔到你首《Yesterday》點出嚟。」


《一生所愛》

作曲、主唱:盧冠廷
作詞:唐書琛
從前現在過去了再不來
紅紅落葉長埋塵土內
開始終結總是沒變改
天邊的你飄泊白雲外
苦海翻起愛恨
在世間難逃避命運
相親竟不可接近
或我應該相信是緣份
情人別後永遠再不來(消散的情緣)
無言獨坐放眼塵世岸(願來日再續)
鮮花雖會凋謝(只願)但會再開(為你)
一生所愛隱約(守候)在白雲外(期待)

蘋果日報 2015年08月01日 撰文:何永寧
http://hk.apple.nextmedia.com/entertainment/art/20150801/19238866

覺得讚想推薦或分享嗎?