台灣導演九把刀憑一部《那些年，我們一起追的女孩》擊敗眾多強敵，成為香港華語片賣座票房總冠軍。

呢個紀錄到今日都未被打破，為台灣電影吐氣揚眉，仲帶紅咗《那些年》女神陳妍希同男神柯震東。近日又有一套講那些年嘅校園片《我的少女時代》喺台灣上映，由台灣導演陳玉珊執導，佢監製過電視劇《命中注定我愛你》同《蘭陵王》等劇，女主角就喺《等一個人咖啡》女主角宋芸樺，望落都有少少陳妍希嘅影子。

故事講述迷戀劉德華嘅宋芸樺，同男主角王大陸聯手對付各自嘅情敵，但不知不覺間兩人都愛上對方，不過就未能開花結果。

電影圍繞90年代發生，當時嘅人睇戲睇周星馳，聽歌自然喺劉德華，戲中牽涉好多香港人都識嘅集體回憶，好似《家有囍事》同劉華嘅歌。

戲中亦搵嚟劉華客串，講長大後嘅女主角陳喬恩去睇劉華演唱會，估唔到就真係畀佢撞到偶像，而長大後嘅男主角就由言承旭飾演。《我》片上星期喺台灣上映，4日票房累計5,000萬新台幣，成績算幾突出，暫定10月會喺香港上映。

蘋果日報 2015/08/17 16:15
http://hk.apple.nextmedia.com/enews/realtime/20150817/54098488

08-11 周星馳「西遊2」開拍 吳亦凡演最美唐僧...

09-25 周星馳登《紐約時報》時尚專刊封面...